امریکی وزیر خارجہ مارکو روبیو نے کہا ہے کہ غزہ میں جنگ بندی کے معاہدے کی امیدیں پہلے سے زیادہ بڑھ گئی ہیں۔ انہوں نے بتایا کہ دونوں فریقین متعدد شرائط پر متفق ہو چکے ہیں، اور اب صرف معاہدے پر عملدرآمد کے طریقہ کار پر تفصیلات طے کرنا باقی ہیں۔
’اے ایف پی‘ کے مطابق، روبیو نے ملائیشیا میں جنوب مشرقی ایشیائی ممالک کے اجلاس کے موقع پر صحافیوں سے بات کرتے ہوئے کہا، “ہم جنگ بندی کے قریب پہنچ چکے ہیں۔ مذاکرات مثبت رخ پر آگے بڑھ رہے ہیں، حالانکہ ماضی میں اسی مرحلے پر بات چیت رک جاتی تھی۔”
انہوں نے حماس پر تنقید کرتے ہوئے کہا کہ اگر حماس اپنے ہتھیار ڈالنے پر رضامند ہو جائے، تو یہ تنازعہ فوری طور پر ختم ہو سکتا ہے۔
یاد رہے کہ گزشتہ روز حماس نے ثالثوں کے ذریعے 10 قیدیوں کی رہائی کی پیشکش کی تھی، لیکن تنظیم نے واضح کیا تھا کہ اب بھی کئی اہم معاملات پر اختلافات موجود ہیں۔ حماس کا کہنا تھا کہ وہ ثالث ممالک کے ساتھ سنجیدگی سے مذاکرات جاری رکھے ہوئے ہے تاکہ غزہ کے عوام کو درپیش مشکلات کو کم کیا جا سکے
