آئی ایس پی آر کے مطابق، فیلڈ مارشل سید عاصم منیر نے مختلف جامعات کے وائس چانسلرز، پرنسپلز اور اساتذہ سے گفتگو کرتے ہوئے کہا کہ “اساتذہ پاکستان کا سب سے قیمتی اثاثہ ہیں۔ میں آج جو کچھ بھی ہوں، اپنے والدین اور اساتذہ کی بدولت ہوں۔”
انہوں نے زور دے کر کہا کہ “پاکستان کی اگلی نسلوں کی تربیت اساتذہ کی ذمہ داری ہے۔ آپ کو نئی نسل کو پاکستان کی حقیقی کہانی بتانی ہے۔ معرکہ حق میں اللہ نے پاکستان کی ہر طرح سے مدد کی۔”
فیلڈ مارشل نے کہا کہ “معرکہ حق ثابت کرتا ہے کہ جب پوری قوم متحد ہو جائے تو دنیا کی کوئی طاقت اسے شکست نہیں دے سکتی۔”
کشمیر اور ہندوستان کے حوالے سے سخت موقف:
انہوں نے واضح کیا کہ “کشمیر پر کوئی سمجھوتا نہیں ہوگا۔ ہم کشمیر کو کبھی نہیں بھولیں گے۔ ہندوستان کو معلوم ہونا چاہیے کہ پاکستان کشمیر کے حق سے دستبردار نہیں ہوگا۔”
انہوں نے کہا کہ “پانی پاکستان کی سرخ لکیر ہے، اور ہم 24 کروڑ پاکستانیوں کے اس بنیادی حق کو کسی کو نقصان نہیں پہنچانے دیں گے۔”
فیلڈ مارشل منیر نے کہا کہ “پاکستان ہندوستان کی بالادستی کبھی قبول نہیں کرے گا۔ ہندوستان نے دہائیوں سے کشمیر کے مسئلے کو دبانے کی کوشش کی، لیکن اب یہ ممکن نہیں۔”
دہشت گردی اور بلوچستان کے حوالے سے:
انہوں نے کہا کہ “دہشت گردی ہندوستان کا اپنا داخلی مسئلہ ہے، جو اقلیتوں بالخصوص مسلمانوں پر ظلم کی وجہ سے ہے۔ جبکہ کشمیر ایک بین الاقوامی مسئلہ ہے۔ بلوچستان میں دہشت گردی کی سازش ہندوستان کی ہے، جن کا بلوچ عوام سے کوئی تعلق نہیں۔”
مضبوط پاکستان کی ضرورت:
فیلڈ مارشل نے زور دے کر کہا کہ “ہمیں پاکستان کو ایک مضبوط ریاست بنانا ہے، جہاں تمام ادارے آئین اور قانون کے مطابق، بغیر کسی دباؤ کے عوام کی بھلائی کے لیے کام کریں۔ جو کوئی بھی ریاست کو کمزور کرنے کی کوشش کرے، اس کی ہر صورت میں مخالفت کی جائے۔”
شرکاء کا ردعمل:
شرکاء نے کہا کہ “یہ محفوظ وطن ہماری افواج کی بدولت ہے۔ ہمیں پاک فوج پر فخر ہے، اور ہم ہمیشہ ان کے ساتھ کھڑے رہیں گے۔”
