فیلڈ مارشل سید عاصم منیر نے کہا ہے کہ بلوچستان میں دہشت گردی کے نیٹ ورکس کی پشت پر بھارت موجود ہے، جو اب پراکسی جنگ سے آگے بڑھ کر کھلی جارحیت پر اتر آیا ہے۔ انہوں نے زور دے کر کہا کہ پاکستان کی افواج دشمن کی ہر چال، خواہ وہ اندرونی ہو یا بیرونی، کو ناکام بنانے کے لیے پوری طرح تیار ہیں۔
جرگہ کے شرکاء سے بات چیت کرتے ہوئے فیلڈ مارشل نے کہا کہ بلوچستان میں امن کسی سودے بازی کا متحمل نہیں ہو سکتا اور پاکستان کا مستقبل اس صوبے کی ترقی سے جڑا ہوا ہے۔ ان کے خطاب کے بعد قبائلی رہنماؤں نے حکومت اور مسلح افواج کے ساتھ اپنی مکمل یکجہتی کا اظہار کیا۔
اس موقع پر وزیراعظم محمد شہباز شریف نے بھی خطاب کرتے ہوئے کہا کہ بلوچستان کے عوام کے مسائل کو باہمی مشاورت سے حل کیا جا سکتا ہے، لیکن دہشت گردی کو کسی صورت برداشت نہیں کیا جائے گا۔ انہوں نے کہا کہ ترقی اور امن ایک دوسرے کے لیے لازم و ملزوم ہیں، اسی لیے آئندہ وفاقی ترقیاتی پروگرام (PSDP) میں بلوچستان کے لیے 25 فیصد مختص کیا گیا ہے۔
وزیراعظم نے یہ بھی کہا کہ 6، 7 اور 10 مئی کو بھارت کی جانب سے پاکستان پر کیے گئے حملوں کے جواب میں افواجِ پاکستان نے بے مثال بہادری کا مظاہرہ کرتے ہوئے دشمن کو ناقابلِ فراموش شکست دی، جسے وہ کبھی نہیں بھول پائے گا۔
