ایران نے اسرائیلی حملوں کے جواب میں ایک بار پھر ڈرونز کے ذریعے اسرائیل پر حملہ کیا ہے۔ ایرانی سرکاری ذرائع کے مطابق، انہوں نے اسرائیل کے دو جنگی طیارے گرانے کا دعویٰ کیا ہے اور ایک خاتون پائلٹ کو حراست میں لیا ہے۔ تاہم، حملوں کی مزید تفصیلات، جیسے کہ طیارے کہاں گرائے گئے یا کس دفاعی نظام کا استعمال کیا گیا، فراہم نہیں کی گئیں۔
اسرائیل کی جانب سے ابھی تک اس دعوے پر کوئی ردعمل سامنے نہیں آیا، لیکن دونوں ممالک کے درمیان صورتحال انتہائی کشیدہ ہے اور دونوں طرف جنگی تیاریاں جاری ہیں۔
ایران کی جانب سے دھمکیاں اور مزید حملوں کا اعلان
ایرانی پاسداران انقلاب (IRGC) نے اعلان کیا ہے کہ انہوں نے اسرائیل کے متعدد اہداف پر جوابی حملے کیے ہیں۔ ایک سینئر عہدیدار نے کہا، “ہمارا بدلہ ابھی شروع ہوا ہے۔ اسرائیل کے کمانڈروں، سائنسدانوں اور شہریوں کے قتل کا خمیازہ انہیں بھگتنا پڑے گا۔ اسرائیل کا کوئی علاقہ محفوظ نہیں رہے گا۔”
ایران کے ڈرونز کے حملوں میں کم از کم 7 افراد زخمی ہوئے ہیں۔ تل ابیب میں سائرن بجنے کے بعد شہریوں نے پناہ گاہوں میں جانے کی کوششیں کیں۔ اسرائیلی وزارت دفاع کے قریب سے آگ کے شعلے اور دھویں کے بھی مشاہدات کیے گئے ہیں۔
یہ حملے اسرائیل کی جانب سے ایران پر کیے گئے حالیہ حملوں کے جواب میں ہیں، جس میں ایرانی فوجی قیادت، ایٹمی سائنسدانوں اور اہم شخصیات کو نشانہ بنایا گیا تھا۔ دونوں ممالک کے درمیان تناؤ خطرناک حد تک بڑھ چکا ہے، اور عالمی برادری تشویش کے ساتھ صورتحال پر نظر رکھے ہوئے ہے۔
