شمالی غزہ کے علاقے بیت حانون میں اسرائیلی فوج اور حماس کے درمیان ہونے والی جھڑپ میں 5 صہیونی فوجی ہلاک اور 14 زخمی ہو گئے ہیں، جن میں سے 2 کی حالت تشویشناک بتائی جا رہی ہے۔
واقعہ رات کے وقت پیش آیا جب اسرائیلی فوج کے اہلکاروں کا گشت کرتے ہوئے ایک روڈ سائیڈ بم سے نشانہ بنایا گیا۔ اسرائیلی فوج کے ترجمان کے مطابق، زخمیوں کو نکالنے کے دوران شدید فائرنگ کا سامنا بھی کرنا پڑا۔ تمام زخمیوں کو فوری طور پر اسپتال منتقل کر دیا گیا ہے اور ان کے اہل خانہ کو مطلع کر دیا گیا ہے۔
فوجی ذرائع کے مطابق، جھڑپ کی جگہ پر پہلے ہی اسرائیلی فضائی حملے ہو چکے تھے۔ ابتدائی تحقیقات سے پتہ چلا ہے کہ فوجیوں کو پیدل گشت کے دوران بم حملے کا سامنا ہوا۔
دوحہ مذاکرات بغیر نتیجہ کے اختتام پذیر
ادھر، قطر کے دارالحکومت دوحہ میں اسرائیل اور حماس کے درمیان جنگ بندی کے مذاکرات کا پہلا مرحلہ بغیر کسی واضح نتیجے کے ختم ہو گیا ہے۔ مذاکرات میں امریکی صدر ڈونلڈ ٹرمپ کے خصوصی ایلچی اسٹیو وٹکوف کی شرکت متوقع ہے۔
ذرائع کے مطابق، امریکا نے 60 دن کی جنگ بندی کی تجویز پیش کی ہے، جس کے تحت حماس 10 زندہ یرغمالوں اور کچھ لاشوں کی واپسی پر رضامند ہو سکتا ہے، جبکہ اسرائیل فلسطینی قیدیوں کو رہا کرے گا۔
حماس نے اپنے مطالبات میں اقوام متحدہ کی نگرانی میں امداد کی منصفانہ تقسیم، اسرائیلی فوجیوں کے انخلا کی ضمانت، اور مستقبل میں جھڑپوں سے گریز کی یقین دہانی شامل کی ہیں۔
ابھی تک دونوں فریقوں کے درمیان کوئی حتمی معاہدہ طے نہیں پایا ہے، اور صورتحال کشیدہ رہنے کے امکانات موجود ہیں۔
