اسلام آباد : پاکستان کی مسلح افواج نے بھارت کی جارحیت کا منہ توڑ جواب دیتے ہوئے صرف 5 گھنٹوں کے اندر دشمن کے جنگی عزائم خاک میں ملا دیے۔ پاک فوج اور فضائیہ نے انتہائی پیشہ ورانہ مہارت، جدید ہتھیاروں اور بروقت فیصلہ سازی کے ذریعے فیصلہ کن برتری حاصل کرلی اور بھارت کو شکست فاش سے دوچار کیا۔
S-400 ڈیفنس سسٹم تباہ، بھارت کی فضائی ڈھال چکنا چور
پاکستان ایئر فورس کے JF-17 تھنڈر طیاروں نے ہائپرسونک میزائلوں کے ذریعے آدم پور میں واقع بھارت کے جدید ترین S-400 ایئر ڈیفنس سسٹم کو نشانہ بنایا، جس کی مالیت تقریباً 1.5 ارب ڈالر تھی۔ اس حملے نے بھارت کی فضائی حفاظتی چھتری کو ناقابل تلافی نقصان پہنچایا۔
سائبر جنگ میں پاکستان کی مکمل برتری
پاکستانی سائبر کمانڈ نے بھارت کے خلاف جارحانہ کارروائی کرتے ہوئے بی جے پی کی سرکاری ویب سائٹ سمیت درجنوں اہم اداروں کے نیٹ ورکس کو ہیک کر لیا۔ ان میں کرائم ریسرچ انویسٹیگیشن ایجنسی، مہانگر ٹیلی کام، بھارت ارتھ موورز، ہندوستان ایروناٹکس، بارڈر سیکیورٹی فورس، اور یوآئی ڈی اے (مخصوص شناختی نظام) شامل ہیں۔ اس کے علاوہ، بھارت کے 70% بجلی گرڈ کو معطل کر دیا گیا، جس سے دشمن کی مواصلاتی اور دفاعی صلاحیتیں مفلوج ہوگئیں۔
بری اور فضائی حملوں میں بھارتی اہداف تباہ
پاک فوج نے مقبوضہ جموں و کشمیر کے علاقے دہرانگیاری میں بھارتی توپ خانے کو تباہ کر دیا، جبکہ ناگروٹا میں براہموس میزائل ڈپو کو نشانہ بنایا گیا، جس سے بھاری جانی و مالی نقصان ہوا۔ اسی طرح، اُڑی میں سپلائی ڈپو اور بھمبر گلی میں بھارتی بریگیڈ ہیڈکوارٹر کو مکمل طور پر تباہ کر دیا گیا۔
فضائی محاذ پر، پاک فضائیہ نے برنالہ، پٹھان کوٹ، باتھِنڈا، سرسا اور اکھنور کے اہم فضائی اڈوں کو تباہ کر کے بھارت کی فضائی صلاحیت کو شدید نقصان پہنچایا۔ بھارتی میڈیا نے بھی سرسا ائیر بیس کی تباہی کو تسلیم کیا ہے۔
لائن آف کنٹرول پر بھارتی چوکیوں کا صفایا
پاکستان کی مسلح افواج نے نیزہ پیر سیکٹر میں دھرم سال 1، دانہ 1 اور ٹیبل ٹاپ پوسٹس سمیت متعدد بھارتی فوجی چوکیوں کو ملیامیٹ کر دیا، جس سے دشمن کی دفاعی لائن بکھر گئی۔
پاکستان کا واضح پیغام
پاکستان نے ایک بار پھر ثابت کر دیا ہے کہ وہ کسی بھی جارحیت کا دندان شکن جواب دینے کی مکمل صلاحیت رکھتا ہے۔ پاکستانی افواج زمینی، فضائی اور سائبر جنگ میں اپنی برتری منوا چکی ہیں۔ دشمن کو واضح پیغام دیا گیا ہے کہ پاکستان کی خودمختاری اور سلامتی پر آنچ آنے کی صورت میں ہر محاذ پر جوابی کارروائی کی جائے گی۔
پاک فضائیہ کے ترجمان نے زور دے کر کہا کہ “ملک کی فضائی سرحدوں کی حفاظت ہر قیمت پر کی جائے گی، اور کوئی بھی دشمن پاکستان کی طاقت کو کم نہ سمجھے۔”
