اسلام آباد:
وزیراعظم محمد شہباز شریف کی زیر صدارت قومی سلامتی کمیٹی کا اہم اجلاس منعقد ہوا جس میں ایران پر اسرائیلی حملوں کی شدید مذمت کی گئی اور ایران کے دفاع کے حق کی بھرپور حمایت کا اعادہ کیا گیا۔
اجلاس میں چیئرمین جوائنٹ چیفس آف اسٹاف کمیٹی، تینوں مسلح افواج کے سربراہان اور اعلیٰ حکومتی وزراء شریک ہوئے۔ اجلاس کے دوران خطے میں پیدا ہونے والی نئی صورتحال اور ایران پر اسرائیلی جارحیت کے اثرات کا تفصیلی جائزہ لیا گیا۔
قومی سلامتی کمیٹی نے اپنے اعلامیے میں اسرائیلی حملوں کو خطے کے امن کے لیے سنگین خطرہ قرار دیتے ہوئے کہا کہ ان اقدامات نے ایران اور امریکا کے درمیان جاری مذاکراتی عمل کو شدید نقصان پہنچایا اور سفارتی کوششوں کے امکانات کمزور کر دیے ہیں، جس سے بڑے پیمانے پر تنازعے کا خطرہ پیدا ہو گیا ہے۔
کمیٹی نے اقوام متحدہ کے چارٹر کے تحت ایران کے حقِ دفاع کی مکمل حمایت کا اظہار کیا اور ایرانی عوام کے ساتھ اظہارِ یکجہتی کرتے ہوئے معصوم جانوں کے ضیاع پر افسوس اور زخمیوں کی جلد صحتیابی کے لیے نیک تمناؤں کا اظہار کیا۔
اعلامیے میں مزید کہا گیا کہ فردو، نطنز اور اصفہان میں ایرانی جوہری تنصیبات پر 22 جون کو کیے گئے حملے بین الاقوامی قوانین، اقوام متحدہ کے چارٹر اور IAEA کی قراردادوں کی واضح خلاف ورزی ہیں، جن پر پاکستان کو گہری تشویش ہے۔ کمیٹی نے عالمی برادری سے مطالبہ کیا کہ وہ اس سنگین صورتحال کا فوری نوٹس لے تاکہ خطے میں مزید کشیدگی سے بچا جا سکے۔
