لاہور : بھارتی افواج کی جانب سے 6 اور 7 مئی کی درمیانی شب کی گئی بزدلانہ جارحیت کے دوران پاک فوج کے دو مزید جوان شہید ہو گئے۔ پاک فوج کے شعبہ تعلقات عامہ (آئی ایس پی آر) کے مطابق، بھارتی فوج نے خواتین، بچوں اور بزرگوں سمیت معصوم شہریوں کو نشانہ بنایا، جس کے جواب میں پاکستانی فوجیوں نے بے مثال بہادری کا مظاہرہ کرتے ہوئے وطن کا دفاع کیا۔
اس جارحیت کے دوران زخمی ہونے والے دو جوان، حوالدار محمد نوید شہید (پاک فوج) اور سینئر ٹیکنیشن محمد ایاز شہید (پاک فضائیہ)، دورانِ علاج شہادت کے رتبے پر فائز ہو گئے۔ اس کے ساتھ ہی شہداء کی کل تعداد 13 ہو گئی، جبکہ 78 فوجی زخمی ہوئے ہیں۔
آئی ایس پی آر نے کہا کہ شہداء کی قربانی ان کی بے پناہ ہمت، فرض شناسی اور حب الوطنی کی عکاس ہے۔ پاکستان کی مسلح افواج اور عوام ان بہادر سپاہیوں کو خراجِ عقیدت پیش کرتے ہیں اور سوگوار خاندانوں کے ساتھ یکجہتی کا اظہار کرتے ہیں۔ زخمی فوجیوں کی صحت یابی کی دعائیں بھی کی گئی ہیں۔
صدر زرداری کا اظہارِ تعزیت
صدر مملکت آصف علی زرداری نے شہید ہونے والے جوانوں پر گہرے دکھ کا اظہار کرتے ہوئے کہا کہ “ہمارے شہداء ہمارا اثاثہ ہیں، ان کی قربانیوں کو کبھی فراموش نہیں کیا جائے گا۔” انہوں نے شہداء کی خدمات کو سراہتے ہوئے قوم سے ان کی یاد کو ہمیشہ زندہ رکھنے کی اپیل کی۔
“پاکستان زندہ باد، افواجِ پاکستان پائندہ باد” کے نعرے کے ساتھ اس عظیم قربانی کو سلام پیش کیا گیا ہے۔
