ملائیشیا میں منعقدہ ایک اہم اجلاس میں آسیان ممالک، چین اور 6 خلیجی تعاون کونسل (GCC) کے رہنماؤں نے باہمی اقتصادی تعاون کو فروغ دینے اور امریکی ٹیرف کے مسائل سے نمٹنے کے لیے مشترکہ حکمت عملی پر غور کیا۔
غیر ملکی ذرائع کے مطابق، آسیان اور خلیجی تعاون کونسل کے مشترکہ اجلاس سے خطاب کرتے ہوئے ملائیشیا کے وزیر اعظم انور ابراہیم نے زور دیا کہ دونوں خطوں کے ممالک کو مستقبل کی ترقی کے لیے اپنے تعاون کو مزید مضبوط بنانا ہوگا۔ انہوں نے کہا، “میرے خیال میں آسیان اور خلیجی ممالک کے درمیان مضبوط تعلقات کی آج سے پہلے کبھی اتنی ضرورت نہیں تھی۔”
انور ابراہیم نے موجودہ جیوپولیٹیکل پیچیدگیوں اور عالمی تجارتی نظام میں تبدیلیوں کی طرف بھی توجہ دلائی۔ ان کا کہنا تھا کہ دنیا ایک نئے دور میں داخل ہو رہی ہے، جہاں امریکہ یکطرفہ تجارتی پابندیاں عائد کر رہا ہے، جس کا مقابلہ کرنے کے لیے مشترکہ اقدامات کی ضرورت ہے۔ ان کے بقول، “کیا دنیا دو بلاکس میں تقسیم ہو رہی ہے؟ یہ ایک اہم سوال ہے جس پر غور کرنا ہوگا۔”
اس اجلاس میں شرکا نے اقتصادی و تجارتی شراکت داریوں کو بڑھانے اور عالمی چیلنجز کے خلاف متحدہ موقف اپنانے پر اتفاق کیا۔
